#Jep...# Sabot angin teu nyoara, girimis lumengis nahan citangis. Nganaha Naha ka mega nu mopoék jomantara. Teu Wasa mawa béja. Harita angin henteu wakca, girimis mudal cisoca. Nganaha Naha ka Mega nu ngabendon jomantara. Meulit lara ning ati na. Lain...! Lain Kitu kuduna. Mun angin daék nyoara harita wakca kasampeur carita... Puhu Desember 2019 #ngayas

Carita sapoe

Beurang, leumpang mapay mapay galeng harepan, ngaliwatan kamalir kamalir kacintana. anjog ka saung luhureun pasir kasono, urang silih patukeur carita moal jalir jeung subaya. menggok panon poe, urang mulang nyimpen paguneman handapeun amparan kaheman. nyesakeun harewos, sampeureun isukan.... Riskaya09@gmail.com#2014

Tepung Deui

Waktu ka tukang, moal balikan deui. wanci kiwari di reret jeung di rasa implengan jeung sawangan. silih udag dina ingetan nyungsi waktu jeung wanci nu kaliwatan. kiwari tepung dina panglawungan, silih patukeur carita, silih simbeuh ku kasono. sono lain bogoh, kanyaah lain ka bebendena, tapi sono nu mawa asih, jeung asuhna dina pangasih Mantena. Mugi ukhuwah manjang salawasna nepika akhirna..... riskaya09, Rajab-27#

SUMERAH

Kalayan cidra nu mancawura
dina kongkolak cimata
ngagurat nyamuni tapak
palastrana wibawa

kasungsi deui.....

DANGIANG ROMADHON

Palataran sya'ban geus tepung jeung panto Romadhon
mangrebu pangasih dina rohangan pangampura geus nganti nganti pangeusina ku jalmi jalmi nu ariman
tegep teuteup pangharepan mireungeuh kana jalan kataqwaan
Gusti nu Maha Asih nu Maha pangampura, Nu Maha suci tur Heman....
tepungkeun dina kasucian dangiang romadhon..........

RUNGKANG BALA NA TATAPAKAN

rungkang jeung regang
maruragan
mancawura na tatapakan
bala kacida
lengkah kahalangan
teu kebat nguniang
kapalang....

HATE JALMA

Ukur giling gisik
Dina bebeneran jeung kasalahan
Tarik ngulur
loba kahayang neang udagan

sakapeung inggis ku bisi
reumpan ku sugan
nyukcruk tapak pangalaman
tabi'at sewang sewangan

ukur giling gisik
dina poek jeung caang
ngitung kuciwa na pangharepan
poho kana baligeusan